1 Комбло - Франц

Монт Блак уулын бэлд шахуу, нүүрээ тольдож болохоор тунгалаг нууранд сэлж, уран зураг мэт байгалийн зураглалыг харах завшааныг зөвхөн Комбло хотод л мэдрэх боломжтой. Зундаа дунджаар +26 градусын дулаантай байдаг аж. Үзэсгэлэнт байгаль, амар амгалан байдлаараа жуулчдын анхаарлыг сүүлийн жилүүдэд асар ихээр татаад байгаа юм. Харин аялах зардлын хувьд онгоцны тийз, хоноглох орон байраа л шийдчихвэл, хоол хүнсний хувьд харьцангуй хямд байдаг аж. 

2 Нью-Форест - Англи

Энд та одой морь, хандгай унах боломжтой бөгөөд тус хот нь амьтны хүрээлэнгээрээ алдартай. Түүнчлэн ууланд авирах, дугуйн спортоор хичээллэх дуртай бол ч бүр давуу талтай. Үдшийн цагаар үзэмж болон үйлчилгээ сайтай уушийн газрууд олноороо үүдээ нээж таныг найрсагаар угтах бөгөөд чимээн шуугиан багатай тул жинхэнэ тайвшралыг мэдэрч болно. 

3 Барселон - Испани

Ла Бокерийн хүнсний захаар зочлонгоо, хүүхдүүддээ сэргээн засварласан өнө эртний үзэмжит байшин барилгуудыг үзүүлэх боломжтой. Хөлбөмбөгийн хорхойтнуудын хувьд жинхэнэ мөрөөдлийн газар билээ. 

4 Шотланд

"Хөгшин" Европын Шотланд улс бол гэр бүлийн бүх гишүүдэд цаанаасаа зориулагдсан мэт амар тайван хэрнээ үзэж харах зүйлс ихтэй, ялангуяа сонирхолтой фестивалууд ихээр зохиогддог газар билээ. Хүүхдүүдэд зориулсан хүүхэлдэйн жүжиг, спортын уралдаан тэмцээнүүд амралтын өдөр бүрээр зохиогддог бөгөөд тасалбарууд нь итгэмээргүй хямд үнэтэй байдаг нь олзуурхууштай юм. 

5 Берлин - Герман

Герман бол бүхэлдээ аялал зугаалга, амар тайван амьдралын "зогсоол" гэлтэй. "Prenzlauer Berg" дүүрэгт тохилог байшин түрээсэлж, "Mauerpark" захаар бэлэг дурсгал, хувцас хэрэглэл, соёлын бараа сонирхон явах сайхан биш гэж үү? Берлин хот бол аль ч улиралд цэвэр агаартай гэдгээрээ алдартай төдийгүй үзвэр үйлчилгээний газраар дүүрэн байдаг нь хүмүүсийн таашаалд нийцдэг билээ.. 

6 Уэльс - Англи

Уэльс нь зүүн талаараа Англи, баруун талаараа Атлантын далай болон Ирландын тэнгисээр хүрээлэгддэг байгалийн бүхий л үзэсгэлэнг өөртөө цогцлоосон газар билээ. Энд хаа ч байхгүй далай тэнгисийн зөөлөн салхи, чийгний үнэрийг уушгиа дүүртэл мэдэрч болно. 

7 Чианг Май - Тайланд

Тайландын үндэсний цэцэрлэгт хүрээлэнг үзэж сонирхонгоо, сармагчингуудтай нөхөрлөж, хүрхрээнээс хулсан завиар бууж, амьдралын амтыг мэдрээрэй. Харин энд ирэхдээ борооны улирлыг тааруулах вий, үүнийг сайн анхаарч үзвэл зохилтой. Энд аялал жуулчлалын оргил улирал нь 11 дүгээр сараас 3 дугаар сар хүртэл үргэлжилдэг бол, борооны улирал нь 6 дугаар сараас 9 дүгээр сар дуустал үргэлжилдэг байна. 

8 Далматиа - Хорват

Хорват улсад далайн эрэг, нуур мөрнүүдэд нь дурласан аялагчид дэлхийн өнцөг булан бүрээс гэр бүлийнхээ хамтаар цуглардаг юм. Крка Үндэсний цэцэрлэгт хүрээлэнд нутагладаг ховор, зэрлэг шувууд, түмэн өнгө солонгоруулсан, үзэсгэлэнтэй эрвээхийнүүд таны хүүхдэд таалагдах нь гарцаагүй. 

9 Олхао - Португаль

Португаль улсын Олхао хот нь хоёр үзэсгэлэнт арлаараа алдартай юм. Далайн эргээр гэр бүлийнхэнтэйгээ алхалж, цагийг зугаатай өнгөрүүлэх шиг сайхан зүйл гэж үгүй мэт. Далайн эргээр нисэх цахлай шувууд, чийглэг уур амьсгал, өвөрмөц орчин зэрэг нь та болон таны гэр бүлийг хором ч уйдаахгүй байна.

10 Вермонт, АНУ

Вермонт мужийн хамгийн үзэсгэлэнтэй, үзэж харах зүйлс арвинтай хот бол Бурлингтон аж. Хараа булаам хөшөө дурсгалууд, хаа саагүй байрлах ногоон байгууламжууд болон “ Loch Ness monster” гэх ховор төрлийн далайн амьтнаараа алдартай бөгөөд үүнээс нь болж тус хотыг зорих хүмүүс бишгүй. Хэрэв та амрахыг хүсвэл нуурын эрэг даган алхаж, стресс ядаргаагаа тайлах боломжтой юм.

11 Норманди, Франц

Та Францын Нормандид долоо хоног амарч, аялахад л хамаг алжаал, ядаргаа тань тайлагдаж, юм үзэж нүд тайлах байна шүү. Гэр бүлээрээ зориход хамгийн тохиромжтой гэж тооцогддог бөгөөд амтат хоол, байгалийн үзэсгэлэн нь аялагчдыг ихээр татдаг юм. Цэвэр цэнгэг агаар, цэлгэр уудам нутгаар аялж, зуны өдрүүдээ зугаатай өнгөрүүлээрэй.

12 Дальян, Турк

Яст мэлхий ихээр нутагладаг Айзтузу арлаараа алдартай Дальян хот нь танай гэр бүлийн аяллын жагсаалтад заавал багтах ёстой шүү. Үзэсгэлэнт байгалийг ажин, өнгө өнгөөр алаглах цэцэгсийг сонирхож, завиар зугаалах бас сайхан биш гэж үү?

13 Алгонкин мужийн цэцэрлэгт хүрээлэн

Хамгийн гайхалтай болоод хараа булаам байгаль гэж ганцхан энийг хэлэх байх хэмээн эрхгүй уулга алдуулах Алгонкин мужийн цэцэрлэгт хүрээлэн нь Канад улсад байрладаг юм. Өнгө өнгөөр солонгорон харагдах модод, хамгийн үзэсгэлэнт байгалийг та гэр бүлийнхнийхээ хамт харж, бишэрч, нүдээ баясгахыг хүсвэл ердөө тус газрыг зориход хангалттай.

14 Кент, Англи

Агуу их түүхийн өлгий болсон Кентэд амралтын өдрүүдээ ая тухтай, адал явдалтай өнгөрүүлэх боломж, хүн бүрийн өмнө нээлттэй байдаг. Эртний эгэлгүй түүхийг агуулсан байшин барилгууд, өвөрмөц өнгө шийдлийг цогцлоосон хүрээлэн буй орчин, харах төдийд амар амгаланг мэдрүүлэх хязгааргүй өргөн далай, халин дэвэн нисэх үзэсгэлэнт шувууд гээд л үзэх харах зүйлс бишгүй байна. Харин хүүхдүүдийн тухайд тэднийг хором ч уйдаахгүй Дижжерланд байх бөгөөд хамгийн гол нь хэн ч тэндээс буцахыг хүсдэггүй аж.

15 Изео нуур, Итали

Зах хязгаар нь үл харагдах хөлгүй их далай танд лав таалагдах биз. Тус газар машин, техник хэрэгслийг хориглодог бөгөөд та зөвхөн унадаг дугуй ашиглаж болно. Ингэснээр таны гэр бүлийн хөгжилтэй дурсамж нэмэгдэж, хамгийн сайхан өдрүүдээ тэнд өнгөрүүлжээ гэх бодол хожим төрөх юм шүү.